Sunnudagur 25.8.2013

Rigning og rok alla vikuna og lítið gert í Hafnargerði. Í dag stytti upp um tíma, en hitinn fór þá niður í 8°C og SV5, heldur hráslagalegt. Ingibjörg og Lára kíktu á hænurnar, en nenntu ekki að vera lengur á staðnum.

  Í gær fórum við í heilmikinn leiðangur með trjáræktarklúbbnum, byrjað var í Reykholti, þá farið í Jarðlengju á Mýrum og endað hjá okkur. Það rigndi talsvert allan daginn, skárst var veðrið þó í Reykholti, en þegar við komum í Hafnargerði var rigningin nánast samfelld. Við gengum samt hring með 9 manns og sýndum helstu afrek. Leysti gesti út með gjöfum, gaf villijarðarber, klukkutopp, körfuvíði og logalauf. Skipti á skógarfuru og meyjarós.